BERRIRO HASTEA
Vanesa Fernandez.ZINEBIko zuzendaria
ZINEBIren itxiera galan Arriaga Antzokiaren oihala jaisten den bakoitzean, hurrengo edizioari hasiera ematen zaio, eta hasiera hori beti iristen da erantzukizunez eta, nola ez, gogo handiz eta ilusioz beteta. Berriz ekitea, bilerei, topaketei, jaialdietara joateari, filmeei eta proposamen berriei, talde eta gogoeta berriei, eratzen den programazioa behar adina iradokitzailea eta konprometitua izan dadin.
Esaten dutenez, hasiera berri bakoitza beste hasiera baten amaieratik dator; hori dela eta, ezinbestekoa da begirik ez kentzea jaialdiak mantendu behar dituen ibilbideari, helburuei eta konpromisoei, ezta hurrengo edizioetan aurre egin beharreko erronkei ere.
Beste behin ere, nire ikuspegi apaletik, askotariko edizio bat eratu dugu, irekia eta heterodoxoa, sortzaileen eta ikusleen artean eztabaida eta espiritu kritikoa sustatu nahi dituena.Zinemaren begirada zinematografiko bereziak interesatzen zaizkigu beti, munduari eta gure gizarteari buruzko ikuspuntu desberdinak ere erakusten dituztenak, zinemagile ospetsuenen esperientzia eta Bilbon urtero biltzen diren talentu berrien ikuspegia uztartzen dituzten filmografien bidez.
Horrela, ehun film baino gehiagoz eta ikusle orori zuzendutako topaketa profesional ugariz gozatuko dugu: profesionalak, kritikariak, zinemazaleak, Bilboko ikusleak, urtero gure hirira etortzen diren gonbidatuak eta bisitariak, guztiak dira ongi etorriak. Gainera, hiperkonexio digitaleko garai hauetan, ez diogu etorkizuneko ikusleengan pentsatzeari utzi nahi, eta gazteenen begirada hezten saiatzen gara.Bestalde, jaialdiak funtsezko kate-maila izaten jarraitzen du euskal sorkuntza berriaren hedapenerako eta hari laguntzeko eta, aurten ere, lotura estua du erakunde nagusi guztiekin. Horren erakusgarri —eta ZINEBItik harro egoteko arrazoia— da aurten ere elkarlanean arituko garela Arriaga Antzokiarekin, Guggenheim Museoarekin, Azkuna Zentroarekin, Gólem Alhondegia Zinema-aretoekin, BBK Aretoarekin, Bilborockekin eta FAS Zineklubarekin.
Industriari buruzko atalek gero eta garrantzi handiagoa dute zinemaldi guztietan. Gure kasuan, jardunaldi profesional gehiago egingo ditugu, ZINEBI NETWORKING Bilboko Zinema Dokumentalaren Foro Profesionalaren seigarren edizioa barne. Foro horren osasun onaren erakusgarri dira foro horretan azken urteotan aurkeztu diren proiektuek izandako arrakasta. Beste Zinema Jaialdiarekin sinergiei dagokienez, Gijóngo Nazioarteko Zinemaldiarekin (FICX) lankidetza egiten jarraitzen dugu, Bilboko eta Gijóngo obren ikusgaitasuna bultzatzeko “baterako premierra” formula aitzindariaren bidez. Horrez gain, ezin dugu ahaztu gure nazioarteko aliantzen garrantzia. Horiek horrela, ZINEBIk Cannes Docs-Marché du Film plataformaren jaialdi bazkide izaten jarraitzen du, zeina zinema dokumentalean espezializatutako mundu osoko ikus-entzunezkoen industriako profesionalak konektatzeko diseinatuta baitago. Ospatzen jarraitzen dugun albistea da hori, ezin baitugu ahaztu nazioartean dugun papera. A klaseko nazioarteko jaialdi bakarra da Estatuan, dokumental eta film laburren espezialitatean, eta jaialdi kalifikatzaile akreditazioa du Oscar sarietarako, BAFTA sari britainiarretarako eta Goya sarietarako. Gainera, ZINEBI EFA (Europako Zinema Akademiaren) sarietarako hautagai den film labur bat aukeratzen duen mundu osoko jaialdien talde murriztuaren parte da. Nazioarteko beste jaialdi batzuekin ezartzen dugun lanerako sarearen baitan, Bilbotik beti sentitu izan gara Oberhausengo lorratzean, film laburraren gotorleku handia baita: aurten Focus Basque Contemporary Cinema. Heterogenous Landscapes programan euskal filmak programatu izanak harro eta alai sentiarazten gaitu.
Urtez urte, uste sendo batekin lanean jarraitzen dugu: zinema jaialdiak gertakari kulturalak gara, zinema berri eta independente garaikidearen filmerik iradokitzaileenak ezagutzera emateko ez ezik, orainaldi eta etorkizun berdinzaleago eta solidarioago bat sortzen laguntzeko funtsezko bozgorailu lana egiten dutenak.
Lerro hauek amaitu aurretik, nire eskerrik beroenak eman nahi dizkiet erakunde guztiei, erakunde laguntzaileei, enpresa ekoizleei, banatzaileei, jaialdiei, prentsari eta ikusleria orokorrari, beste behin ere emandako babes eta maitasun guztiarengatik. Edizioz edizio, orri zuri berri bati helduko diogu, ZINEBIren nortasuna ahaztu gabe, eta jaialdia esperientzia presentziala, kolektiboa, anitza eta berdintasunezkoa dela eta izango dela ahaztu gabe.
Berriro hastea, jarraitzeko.
