Sariak

Mikeldi Sariaren garaikurra Maite Leyún euskal artista plastikoak Bizkaiko irudi ezagunenetako baten gainean egindako berrirakurketa da: Mikeldiko idoloa, basurdea irudikatzen duen hareharria da, eta Bilboko Film Laburren eta Dokumentalen Nazioarteko Jaialdiaren bereizgarria izan da 1959.ean egin zen lehenengo ediziotik. Une hartan, sortzaileek beraiek argi azaldu zituzten garaikurra aukeratzeko arrazoiak. Dokumentalen arloan nazioarteko zine-sarien lehendabiziko lerroan kokatzea zen asmoa, eta honela justifikatzen zuten sinbolo haren izena eta irudia: “basurdea irudikatzen duen hareharria, Durangon topatutakoa (Bizkaia), Bizkaiko sinbolo bereizgarria da […]; Penintsulan aurkitutako zezen eta aketzen antzera, eskaintza zeltikoa da hau ere, Bizkaikoa soilik den eguzki- edo ilargi-diskoa erakusten duena”. Bilboko Euskal Museoan aurki dezakegun irudi horretatik abiatuta (jaialdiaren hasieratik irudi horren miniaturazko erreprodukzioak eman ziren garaikur gisa), Maite Leyúnek dioenez, “ezagun dugun ezer gogoraraziko ez digun, baina, aldi berean, Mikeldi gogoraraziko digun forma berri bat sortzea izan da nire asmoa”. Hala, ZINEBIren egungo garaikurra “antzinako tailla bat abiapuntu duen zeramika-objektua da; zerbait kontatzearekin batera, gauzak egiteko moduari garrantzia ematen dioten pertsonen lana aitortzeko balioko duen forma berri bat”.