ZINEMA DOKUMENTALAREN BILBOKO VII. FORO PROFESIONALA
ZINEBI NETWORKING
2024
PARTE HARTZEKO OINARRIAK
A. Alderdi orokorrak eta Foroaren xedea
1. Zinema Dokumentalaren Bilboko VII. Foro Profesionala, ZINEBI Networking 2024, zinema dokumentalean sortzen ari den sorkuntza sustatzera bideratuta dagoen ekimena da, baita ikus-entzunezkoen ekoizpena bultzatzera eta harremanak dinamizatzera ere, sektoreko eragileen eta industria zinematografikoko eta ikus-entzunezko industriako tokiko zein nazioarteko erakundeen artean. ZINEBI Bilboko Dokumentalen eta Film Laburren Nazioarteko Jaialdiaren 66. edizioaren esparruan egingo da, 2024ko azaroaren 11tik 15era.
2. Ekintza honen bidez, ZINEBI Bilboko Dokumentalen eta Film Laburren Nazioarteko Jaialdiak proiektu dokumental, sortzaile eta independenteen garapena bultzatzeko konpromisoari eusten dio; sormenerako, hausnarketarako, aholkularitzarako eta zinemagileen lanari bultzada emateko espazioak eraikitzeko konpromisoari, eta, azkenik, honakoek elkarren artean topo egiteko dinamikak bultzatzeko konpromisoari: sortzaileak, ekoizleak, eta enpresa eta profesionalen belaunaldi berrien ekoizpen zinematografikoa eta nazioarteko proiekzioa babesten duten sektoreko gainerako eragile eta erakundeak. ZINEBIk, Foroaren bidez, parte hartzaileen eta profesionalen eta adituen arteko harremana erraztu nahi du; izan ere, azken horiek baitira parte hartzaileei beren proiektuak arrakastaz garatzeko eta produzitzeko moduari buruzko aholkularitza emango dietenak.
3. ZINEBI Bilboko Dokumentalen eta Film Laburren Nazioarteko Jaialdiak antolatutako VII. Foroak Europar Batasuna-NextGenerationEUren babesa eta finantzaketa ditu, Eusko Jaurlaritzako Kultura eta Hizkuntza Politika Sailaren, EITB MEDIAren, Zineuskadiren eta Europa Creativa Desk Media Euskadiren bitartez.
B. Parte hartzeko baldintzak eta konpromisoak
1. ZINEBI NETWORKING 2024 zabalik dago egoitza Euskal Autonomia Erkidegoan edo Espainiako Estatuan duten ekoizle eta zuzendarientzat.
2. Zuzendari bakoitzak proiektu bakarrarekin eman dezake izena, baina horrek ez du eragozten produkzio-etxe berak proiektu bat baino gehiagoren izena eman ahal izatea.
3. Izena ematen duten filmek film luzeak izan behar dute, dokumentalak edo ez-fikziozkoak, eta oso aurreratuta edo produkzio fasean egon behar dira. Film luzetzat hartuko dira 60 minutu edo gehiagoko iraupena duten film zinematografikoak. Ez dira onartuko amaituta dauden lanak, postprodukzioa master digitala egin edo lortu aurretik burututa dutenak, izena emateko epea amaitu baino lehen jendaurrean erakutsi direnak, edo nazionalitatea eta adinaren araberako kalifikazio-ziurtagiria eskatu dutenak.
4. Proposamenek originalak behar dute, hirugarrenei plagiorik edo usurpaziorik egin gabe.
5. Parte hartzaileek konpromisoa hartzen dute antolatzaileek eskatzen dieten dokumentazio guztia bidaltzeko.
C. Izena emateko epea eta modua
1. Izena emateko epea 2024ko uztailaren 17tik irailaren 8ra arte egongo da zabalik, biak barne.
2. Izen-ematea doakoa da.
3. ZINEBI NETWORKING 2024en parte hartu nahi duten pertsona fisiko edo juridikoek web formularioaren bidez eman behar dute izena nahitaez, oinarriak onartzen dituztela adieraziz eta formularioan eskatzen diren datu pertsonalak zehaztuz.
4. Izena emateko formularioa bete eta bidali ondoren, oinarri hauetan eskatutako dokumentazioa honako helbide elektronikora bidali behar da: festival@zinebi.eus.
D. Dokumentazioa
Izena emateko web formularioa bete ondoren, jarraian adierazten diren dokumentuak bidali behar dira, PDF formatuko dokumentu bakarrean (izartxo batez markatutako atalak nahitaezkoak dira):
1. Proiektuaren fitxa teknikoa eta artistikoa *
2. Sinopsia gaztelaniaz eta ingelesez (gehienez 600 karaktere) *
3. Proiektuaren teaserra ingelesez azpititulatuta (gutxienez 4 minutuko iraupena) *
4. Proiektuaren asmoen, produkzioaren garapenaren eta garapen artistikoaren berri ematen duen oharra (gehienez 2.100 karaktere) *
5. Proiektuaren azalpen-memoria (gehienez 3.500 karaktere) *
6. Egin nahi den proiektuaren proposamen estetikoa eta artistikoa *
7. Proiektuaren aurrekontu orokorra eta xehatua (ahal izanez gero, ICAAren formatuarekin) *
8. Kronograma eta produkzio-plana *
9. Finantzaketa-plana *
10. Gidoia edo tratamendua
11. Zuzendariaren biografia eta filmografia gaztelaniaz eta ingelesez *
12. Produktorearen biografia laburra gaztelaniaz eta ingelesez *
13. Zuzendariak aurretik egindako lanetarako estekak *
E. Hautaketa prozesua eta irizipideak
1. Aurkeztutako proiektuen artetik, hautaketa batzorde batek, Jaialdiaren zuzendaritzarekin batera, 16 aukeratuko ditu gehienez (Euskal Autonomia Erkidegoko 6 gehienez, eta EAEz kanpoko Espainiako Estatuko Erkidegoetako 10 gehienez). Hautatutako proiektuak azaroaren 11tik 14ra bitartean aurkeztuko dira Bilboko Dokumentalen eta Film Laburren Nazioarteko Jaialdiaren esparruan.
2. Hautaketa horretan, aintzat hartuko dira proiektu bakoitzaren ideia, proposamen estetikoa, bideragarritasuna eta gauzatzeko aukerak. Hautaketa hori posta elektronikoz jakinaraziko zaie proiektu bakoitzeko produktoreei, aurtengo urrian.
F. Dinamika
1. Parte hartzen duten proiektu guztien ordezkariek tutoretza pertsonalizatuko saio bat izango dute, sektoreko profesional baten bermearekin. ZINEBI NETWORKINGen jardunaldietan zehar, antolatzaileek ezarritako topaketetara joango dira, pitch edo proiektuaren aurkezpen publikoa egingo dute, eta berariaz antolatutako buruz buruko saioetan ere parte hartuko dute, proiektuari buruzko aholkularitza jasotzeko.
2. Foroa amaitu ondoren, antolatzaileek konpromisoa hartzen dute 2024. eta 2025. urteetan zehar jarraipenerako online topaketak egiteko, bai eta hautatutako proiektuei laguntza eta aholkularitza ematekoa ere.
G. Parte-hartzea onartzea
1. Esleipena egiten denetik zenbatzen hasita, hautatuek 5 egun balioduneko epea izango dute foroko parte-hartzea onartzeko. Hautatutako proiektu guztiek oinarrien onarpena adierazten duen akordio bat sinatuko dute azken hautaketa iragarri ondoren; horrez gain, oinarrietan ezarritako konpromisoak eta betebeharrak onartzen dituztela adierazten duen zinpeko aitorpen bat sinatuko dute.
2. Hautatutako proiektu bakoitzeko, ZINEBI Bilboko Dokumentalen eta Film Laburren Nazioarteko Jaialdiaren antolatzaileek honako gastu hauek hartuko dituzte bere gain produktorearentzat eta zinemagilearentzat:
· Bilborako joan-etorriko garraioaren kostuak, Espainiako Estatuko edozein lekutatik.
· Ostatua eta dietak
· ZINEBI Bilboko Dokumentalen eta Film Laburren Nazioarteko 66. jaialdiko proiekzio guztietara joateko akreditazio balioduna.
3. Lankidetzarako eta sarean egiten den Foro batek dakartzan premia eta aukera generikoez harago, hautatutako proiektu bakoitzak honako konpromiso hauek hartzen ditu Foroarekin:
· Proiektua Foroan parte hartzeko hautatutako beste hiru proiektutako arduradunekin partekatzeko baimena ematea.
· Antolatzaileek eskatzen dutenean, Foroak buruz buruko bilera presentzialetan hautatutako beste hiru proiektu kontrastatzen laguntzea. Horretarako, antolatzaileek parte hartzaileei proiektu horiek irakurtzeko eskatuko diete, behar adina aurreikuspenarekin.
H. Sariak
1. Epaimahaia industria zinematografikoko profesionalez eta adituz osatuta egongo da, eta hura arduratuko da zuzendari eta produktoreei aholkularitza eskaintzeaz, bai aurkezpenak egin ondoren, bai buruz buruko bileretan. Sariak ZINEBI Bilboko Dokumentalen eta Film Laburren Nazioarteko Jaialdiaren itxiera galan banatuko dira, azaroaren 15ean, Arriaga Antzokian. Epaimahaiaren erabakia apelaezina izango da:
1.1. ZINEBI NETWORKING 2024 Euskadi saria
Epaimahaiak hautatutako Euskal Autonomia Erkidegoan kokatutako pertsona fisiko edo juridikoek ekoitzitako proiektuek 15.000 euroko saria jaso ahal izango dute.
EITBk ZINEBI Networking Bilboko Zinemaren VII. Foro Profesionalean parte hartzen du, ZINEBI Networking 2024 Euskadi Saria bultzatuz, euskal talentua sustatzeko, proiektua garatzen lagunduz.
Helburu horrekin, proiektua garatu ondoren, irabazleak ustiapen-eskubideak lagatzeko dagokion kontratua sinatuko du EITBrekin, lagapenaren baldintzak zehazteko. Kontratu horretan, gutxienez, free tv linealeko 3 emanaldi hartuko dira barne, bai eta hiru hilabeteko leiho bat ere, EITBren webgunearen eta plataformen bidez interaktiboki eskuragarri jartzeko. Proiektua garatzen amaitu ondoren, EITBko proiektuen baloraziorako batzordeak hala baderitzo, ekarpen hori handitu egin daiteke eskubideen lagapenaren irismena handitzearen truke.
1.2. ZINEBI NETWORKING 2024 Estatuko saria
Egoitza Espainiako Estatuan —Euskal Autonomia Erkidegotik kanpo— duten pertsona fisiko edo juridikoek produzitutakoak diren, eta Epaimahaiak hautatutakoak diren proiektuek 15.000 euroko saria jasotzeko aukera izango dute.
I. Hautatutako proiektuen baldintzak eta betebeharrak
1. Zinema Dokumentalaren Bilboko VII. Foro Profesionala, ZINEBI Networking, Bilbon egingo da, 2024ko azaroaren 11tik 15era. Hautatutako proiektuetako parte hartzaileek programako jarduera presentzial eta onlineko guztietan parte hartzeko konpromisoa hartzen dute, baita Foroa egiten den egunetan Bilbon presentzialki egotekoa ere, behar bezala justifikatutako ezinbesteko arrazoiak daudenean izan ezik. Posible ez bada, antolakuntzak beretzat gordetzen du ordezko beste proiektu bat gonbidatzeko eskubidea.
2. Parte hartzaileek antolatzaileek dagokion katalogoa, eskuko programa, web orria, sare sozialak eta abar egiteko eskatzen dizkieten informazioa eta sustapenerako materialak eman behar dizkiete, eta berariaz baimenduko dute horiek hedatzea, Jaialdiaren eta Foroaren jardueren berri emateko.
3. Foroan parte hartu duten eta azkenean garatu diren lanek nahitaez jaso beharko dute filmaren amaierako kredituetan proiektuak ZINEBI Networking Zinema Dokumentalaren Bilboko Foro Profesionalaren laguntza jaso zuela, “ZINEBI Networking Zinema Dokumentalaren Bilboko VII. Foro Profesionalean hautatutako proiektua” hitzekin eta antolatzaileek ematen dizkieten logotipoekin. Halaber, parte hartzaileek konpromisoa hartzen dute, ahal den neurrian, parte hartze hori jakinarazpen publiko eta publizitario orotan aipatzeko, baita haien ingurune, komunitate, kartel, presskit, prentsa-ohar, sare sozial, webgune, sustapenerako material, eta gainerako euskarri fisiko eta digitaletan ere.
4. ZINEBI Networking, Zinema Dokumentalaren Bilboko VII. Foro Profesionalaren sariak jasotzen dituzten lanek honako hauek jaso beharko dituzte, halabeharrez, hasierako kredituetan: “ZINEBI Networking Zinema Dokumentalaren Bilboko VII. Foro Profesionaleko proiektu irabazlea”, Foroaren antolatzaileek ematen dizkieten logotipoekin batera. Halaber, proiektu irabazleek konpromisoa hartzen dute parte hartze hori jakinarazpen publiko eta publizitario orotan aipatzeko, baita haien ingurune, komunitate, kartel, presskit, prentsa-ohar, sare sozial, webgune, sustapenerako material, eta gainerako euskarri fisiko eta digitaletan ere.
5. Behin film luzeak amaituta, proiektu irabazleek konpromisoa hartzen dute ZINEBI Bilboko Dokumentalen eta Film Laburren Nazioarteko Jaialdiari amaierako lana modu pribatuan ikusteko esteka bat eskaintzeko, lehen aldiz jendaurrean jarri aurretik. Horrez gain, proiektua Estatuan lehen aldiz jendaurrean ikusgai jartzen denetik bi hilabeteko epean, film luzearen kopia bat eman beharko diote ZINEBI Bilboko Dokumentalen eta Film Laburren Nazioarteko Jaialdiari, ondare zinematografikoa eta ikus-entzunezkoa babesteko dituen helburuak bete ditzan. Jaialdiak ezin izango du kopia horren erabilera publikorik egin produkzio-enpresaren aldez aurreko baimen espliziturik gabe.
6. ZINEBI Bilboko Dokumentalen eta Film Laburren Nazioarteko Jaialdiak, bere aldetik, konpromisoa hartzen du proiektu irabazleak programazio-taldearekin batera baloratzeko, Jaialdiaren edozein sail ofizial edo paralelotan Estatu mailan estreinatu ahal izateko, baina horrek ez du ekarriko produkzio-etxeak estreinatzeko inolako betebeharrik.
7. Hautatutako proiektuek parte-hartze agiri bat jasoko dute ZINEBI Networking Zinema Dokumentalaren Bilboko VII. Foro Profesionalaren eskutik.
J. Programa atzeratzea edo bertan behera uztea. Oinarriak aldatzea
1. ZINEBI Bilboko Dokumentalen eta Film Laburren Nazioarteko Jaialdiak beretzat gordetzen du ZINEBI Networking Zinema Dokumentalaren Bilboko VII. Foro Profesionala osorik edo zati batean eteteko, atzeratzeko edo bertan behera uzteko eskubidea, ezinbesteko arrazoiengatik edo behar bezala justifikatutako arrazoiengatik, eta etete, atzeratze edo bertan behera uzte horrek ez dio inolako erantzukizunik ekarriko ZINEBI Bilboko Dokumentalen eta Film Laburren Nazioarteko Jaialdiari, zeinak ahal bezain laster egingo baitie jakinarazpena parte hartzaileei.
2. Halaber, ZINEBI Bilboko Dokumentalen eta Film Laburren Nazioarteko Jaialdiak esku artean dituzun oinarriak osorik edo zati batean aldatzeko eskubidea beretzat gordetzen du, baita oinarriontzako eta arauentzako salbuespen zehatzak ezartzeko eskubidea ere, ezinbesteko arrazoiengatik edo ZINEBI Networking Zinema Dokumentalaren Bilboko VII. Foro Profesionala, behar bezala garatzeko guztiz beharrezkoa denean, behar bezala arrazoitutako kausak direla eta. Esku artean dituzun oinarri hauek aldatuz gero, ZINEBI Bilboko Dokumentalen eta Film Laburren Nazioarteko Jaialdiak egoera horren berri emango du, honako hauek zabaldu edo argitaratzeko baliatu dituen bitarteko berberak erabiliz.
K. Irudi-eskubideak
1. Parte hartzaileek baimena ematen diete ZINEBI Bilboko Dokumentalen eta Film Laburren Nazioarteko Jaialdiari eta Bilboko Udalari, bai eta horiek baimendutako hirugarrenei ere, beren irudia, ahotsa, izen-abizenak (eta, hala badagokio, izen artistikoa), argazkia, erretratua eta irudi fisikoa, hautemangarri egiten duen edozein bitarteko grafiko, tekniko edo artistikoren bidez erreproduzitu edo sortutakoa, jasotzeko, finkatzeko edo erreproduzitzeko; biografia, espediente profesionala eta identifikazio pertsonalerako gainerako datuak edo elementuak ere barne hartuko dira (aurrerantzean, hori guztiari buruz hitz egiteko “Irudia” erabiliko da).
2. Irudia jasotzeko eta erabiltzeko baimena proiektuaren eta, ZINEBI Networking Zinema Dokumentalaren Bilboko VII. Foro Profesionalaren garapena dokumentatzeko eta sustatzeko ematen da, legeak baimendutako gehieneko eperako, eta mundu osoan, eta edozein ustiapen-modalitateren, euskarriren, formaturen edo hedapenerako bideren bitartez egin ahalko da. Aurreko baimenean berariaz jasotzen da irudia jaso ahal izatea ZINEBI Networking Zinema Dokumentalaren Bilboko VII. Foro Profesionalean parte hartzen duen bitartean, bai eta ZINEBI Bilboko Dokumentalen eta Film Laburren Nazioarteko Jaialdiarekin lotutako mota guztietako jarduera eta ekitaldietan ere (hala nola, berariaz adieraztearren, argazki saioak, jendaurreko aurkezpenak, prentsaurrekoak, etab.).
L. Datu pertsonalak babestea
1. Tratamenduaren arduraduna: ZINEBI Bilboko Dokumentalen eta Film Laburren Nazioarteko Jaialdia. Arriaga Antzertia Kultur Ihardueretako erakundea, S.A.. Erakundearen egoitza soziala: Arriaga plaza 1, 48005 Bilbo / Bizkaia. IFK: A48211205 DBOrekin harremanetan jartzeko: informacion@teatroarriaga.eus
2. Tratatu beharreko datuak: eskabideak aurkezteko formularioan jasotakoak, atxikitako dokumentuak eta ZINEBI Networking Zinema Dokumentalaren Bilboko VII. Foro Profesionalaren antolatzaileei proiektuak hautatzeko prozesuan ematen zaion informazio guztia.
3. Tratamenduaren helburua: sariak emateko eta ZINEBI Networking Zinema Dokumentalaren Bilboko VII. Foro Profesionala behar bezala garatzeko kudeaketa.
4. Erabaki automatizatuak: ez da profilen segmentaziorik egiten, ezta erabaki automatizaturik hartzen ere.
5. Eskabideen datuak ZINEBI Networking Zinema Dokumentalaren Bilboko VII. Foro Profesionalaren hautaketa prozesuak eta/edo garapenak irauten duen bitartean gordeko dira. Epe hori igaro ondoren, datuak blokeatuta mantendu ahal izango dira, baldin eta antolatzaileen legezko betebeharrak betetzeko beharrezkoa bada.
6. Hartzaileak: antolatzaileak eta Epaimahaia osatzen duten kideak, baita profesional independenteak eta Bilboko Udaleko kideak ere.
7. Eskubideak: ZINEBI Networking Zinema Dokumentalaren Bilboko VII. Foro Profesionalarekin lotura duen edonork eskubidea du ZINEBI Bilboko Dokumentalen eta Film Laburren Nazioarteko Jaialdia bere datu pertsonalak tratatzen ari den ala ez baiezta diezaioten. Interesdun gisa, zure datu pertsonaletara sartzeko eskubidea duzu, baita datu okerrak zuzentzeko eskatzeko edo, hala badagokio, datuak ezabatzeko eskatzeko eskubidea ere, besteak beste, jasotako helburuetarako beharrezkoak izateari utzi badiote.
Inguruabar jakin batzuetan, zure datuen tratamendua mugatzeko eskatu ahal izango duzu; kasu horretan, erreklamazioak egiteko edo defendatzeko baino ez dira gordeko.
Inguruabar jakin batzuetan, eta zure egoera partikularrarekin zerikusia duten arrazoiengatik, zure datuen tratamenduaren aurka egin ahal izango duzu. ZINEBI Bilboko Dokumentalen eta Film Laburren Nazioarteko Jaialdiak datuak tratatzeari utziko dio, ezinbesteko arrazoi legitimoak daudenean, edo erreklamazio posibleak egin edo defendatu behar direnean izan ezik.
Zure datuen tratamendua zure baimenean oinarritzen bada, edozein unetan ezeztatu ahal izango duzu.
Legez egokia den kasuetan, datuen eramangarritasunerako eskubidea izango duzu, eta horrek esan nahi du eskubidea duzula zuri buruzko datu pertsonalak, ZINEBI Bilboko Dokumentalen eta Film Laburren Nazioarteko Jaialditik tratatzen ari direnak, jasotzeko eta zure gailu batean gordetzeko. Eskubide horrek aukera ematen dizu, halaber, ZINEBI Bilboko Dokumentalen eta Film Laburren Nazioarteko Jaialdiari zure datuak tratamenduaren beste arduradun bati jakinaraz diezazkion eskatzeko.
Zure datuen tratamenduari buruzko edozein konturako, bai eta egindako datuen tratamenduari buruz ZINEBI Bilboko Dokumentalen eta Film Laburren Nazioarteko Jaialdiari helarazi nahi diozun gorabehera edo komunikazioren bat baduzu, festival@zinebi.eus helbidera ere jo dezakezu. Horretarako, zure NANaren kopia bat edo zure eskubideak baliatzeko legez identifikatzen zaituen beste agiriren bat atxiki beharko duzu.
M. Gatazkak ebaztea
Esku artean dituzun oinarrien interpretazioaren inguruan sor daitezkeen zalantzak eta oinarrien aplikaziotik sor daitezkeen gatazkak ZINEBI Bilboko Dokumentalen eta Film Laburren Nazioarteko Jaialdiaren antolatzaileek ebatziko dituzte.
N. Harremanetarako datuak
Oinarriei buruzko edozein zalantza argitu nahi izanez gero, jarri harremanetan festival@zinebi.eus helbidean.
