Fronte guzietan, Ramón Barea
2018an, hirurogeigarren edizioan, ZINEBIk Mikeldi Berezi bat eman zien hirurogeita hamarreko hamarkadatik Bilbon egindako zinemari jarraipena eman zioten pertsona batzuei. Ramón Barea zegoen haien artean. Zortzi urte geroago, jaialdiak banako saria eman nahi izan dio Ohorezko Mikeldiaren bidez, eta bere ibilbideari merezi duen arreta eskaini.
1949an Bilbon jaioa, Bareak bulegari lana utzi zuen eszenan jarduteko. Hirurogeita hamarreko hamarkadan Cómicos de la Legua eta Karraka taldeen sortzaile eta aktoreetako bat izan zen, zeinak konpainia erabakigarriak izan baitziren euskal antzerki independentearen garapenean. Aktore, zuzendari eta egilea da, 2013ko Antzerki Sari Nazionala jaso zuen, eta bere ibilbidea antzerkia egiteko espazioen sorkuntzarekin ere lotuta dago. Zorrotzaurren kokatuta dagoen Pabellón 6ek (haren bultzatzaile ere izan zen) bokazio hori luzatzen du, eta aukera eman du antzezleen eta sortzaileen belaunaldi berriak elkartzeko eta sortzeko.
Zineman La fuga de Segovia (Imanol Uribe, 1981) filmarekin egin zuen debuta, eta ehundik gora filmetan parte hartu du, besteak beste, Enrique Urbizu, Julio Medem, Álex de la Iglesia, Juanma Bajo Ulloa, Icíar Bollaín, Montxo Armendáriz eta Pablo Berger zinemagileekin. Cinco lobitos (Alauda Ruiz de Azua, 2022) filmarekin, 73 urte zituela, Goya sarietarako lehen hautagaitza jaso zuen. Bere ibilbidea lanaren jarraitutasunak eta pertsonaien zein erregistroen dibertsitate handiak markatzen dute.
Zinemagile gisa ere egin du ibilbide propioa. Adiós, Toby, adiós (1996) eta Muerto de amor (1997) film laburrak zuzendu zituen, baita Pecata minuta (1998) eta El coche de pedales (2004) film luzeak ere, biak Felipe Lozarekin idatzitakoak.
ZINEBIk, orain, Bilboko Ohorezko Mikeldia emango dio Bilbon, eszenako eta zinemako ia ogibide guztietan aritzera eraman duen ibilbideari ekin zion hirian, eta berak, beti laguntzeko eta bultzatzeko prest, hainbeste eman dion hirian.
Joseba Lopezortega
