ZINEBI EXPRESSEK 18. EDIZIOARI EKINGO DIO, LAU EGUNETAN GEHIENEZ HIRU MINUTUKO FILM LABUR BAT GRABATZEKO ERRONKAREKIN

• Zinema eta ikus-entzunezkoen arloko Graduko eta Lanbide Heziketako 100 ikasle baino gehiago bildu ziren atzo, azaroaren 5ean, ostegunez, TUMO Bilbao-Bizkaia zentroan egin zen ekimenaren aurkezpenean.
• Lara Izagirre zinemagileak zinemagintzan izandako esperientzia partekatu zuen, baita zinemari adierazpenerako eta topaketarako espazio gisa buruz duen ikuspegia ere.
• ZINEBI Expressek hiru diru-sari banatuko ditu: 800, 600 eta 400 eurokoak, hurrenez hurren. Gainera, saritutako taldeek ZINEBI 68rako akreditazioak jasoko dituzte, eta Jaialdiaren jardueretan parte hartu ahal izango dute. Jaialdia azaroaren 20tik 27ra bitartean egingo da.

Bilboko Udalak antolatzen duen Bilboko Dokumentalen eta Film Laburren Nazioarteko Jaialdiak, ZINEBIk, martxan jarri du ZINEBI Expressen 18. edizioa. Lehiaketa horrek parte-hartzaileei erronka berezi bat proposatzen die: gehienez hiru minutuko film labur bat asmatu, grabatu eta muntatzea lau egunetan. Lehiaketa atzo, azaroaren 5ean, hasi zen, eta taldeek datorren azaroaren 9ra arte izango dute beren lanak amaitzeko.

Ekimenak denboraren aurkako sorkuntza zinematografikoko ariketa proposatzen du: parte-hartzaileek atzo ezagutu zuten landu beharreko gaia, eta egun gutxi batzuk dituzte ideia bat ikus-entzunezko pieza amaitu bihurtzeko. Erronkak haien sormena, inprobisatzeko gaitasuna eta talde-lana proban jarriko ditu, film baten ekoizpen-prozesuko fase guztiak denbora mugatuan zeharkatuz.

Deialdia edozein nazionalitatetako taldeei zuzenduta dago, bai zinema eta ikus-entzunezkoetako ikasleei, bai prestakuntza-zentroekin loturarik ez duten pertsonei ere. Talde bakoitzak film labur bakarra aurkeztu ahal izango du.

ZINEBI Express 2026ren aurkezpena atzo egin zen TUMO Bilbao-Bizkaia Sormen Teknologien Zentroan, Azkuna Zentroa–Alhóndiga Bilbaon, eta bertan parte hartu zuten zinemaren eta ikus-entzunezkoen alorreko Graduko eta Lanbide Heziketako 100 ikasle baino gehiagok.

Era berean, Lara Izagirre zinemagile bizkaitarrak “Zaintzen gaituen zinema” hitzaldia eskaini zuen. “Un otoño sin Berlín” eta “Nora” film luzeen zuzendariak zinemagintzan izandako esperientzia partekatu zuen, baita zinemari adierazpenerako eta topaketarako espazio gisa buruz duen ikuspegia ere.
Ekitaldian aurtengo edizioko gaia aurkeztu zen, eta parte hartuko duten taldeen aurrez aurreko izen-ematea zabaldu zen. Horrela hasi ziren ikus-entzunezko sorkuntzako lau jardunaldi biziak.

ZINEBI Expressek hiru diru-sari banatuko ditu: 800, 600 eta 400 eurokoak, hurrenez hurren. Gainera, saritutako taldeek ZINEBI 68rako akreditazioak jasoko dituzte, eta Jaialdiaren jardueretan parte hartu ahal izango dute. Jaialdia azaroaren 20tik 27ra egingo da.

Egindako film laburren proiekzioa eta sari-banaketa azaroaren 23an, astelehenez, goizez egingo dira, Bizkaia Aretoa – EHUko Mitxelena Aretoan (Abandoibarra etorbidea 3, Bilbo).

Bere hamazortzi edizioetan zehar, lehiaketa aukera paregabea bihurtu da hizkuntza zinematografikoa esperimentatzeko, sormena eta talde-lana sustatzeko eta ikus-entzunezkoen alorreko ahots berriak ezagutzeko. Ekimenak EHUko Gizarte eta Komunikazio Zientzien Fakultatearen, Arte Ederren Fakultatearen, Euskal Herriko Zinema Eskolaren, Tartanga Lanbide Heziketako Ikastetxe Integratuaren eta beste hainbat erakunde eta ikastetxeren laguntza eta partaidetza ditu.

Halaber, ZINEBI Ataria egitasmoaren parte da. Jaialdiaren espazio horren helburua da ikus-entzunezkoen prestakuntza, talentu berria eta jardun profesionala lotzea. Bertan kokatzen da, era berean, GazteDoku ekimena ere, SGAE Fundazioarekin batera antolatua eta EHUren babesarekin garatua.