ZINEBIK GAZTEDOKU ABIARAZI DU, GAZTE ZINEMAGILEEI BERE DOKUMENTAL-PROIEKTUEN GARAPENEAN LAGUNTZEKO PROGRAMA

• SGAE Fundazioarekin batera eta EHUren laguntzarekin antolatutako ekimenak 25 proiektu jaso ditu lehen edizio honetan.
• Gehienez zortzi proiektuk, horietatik lau Euskadikoak eta beste lau Estatukoak , prestakuntza-jardueretan, aholkularitza-saioetan eta profesionalekin egingo diren topaketetan parte hartuko dute ZINEBI 68ren barruan.
• Bi proiektuk 3.000 euroko laguntzak jasoko dituzte, eta 2027ko ZINEBI Foro Profesionalean beren garapenarekin jarraitzeko aukera izango dute.

Bilboko Udalak antolatzen duen Bilboko Dokumentalen eta Film Laburren Nazioarteko Jaialdiak – ZINEBIk GazteDoku abiarazi du, dokumental eta ez-fikziozko proiektuen sorkuntzako lehen urratsetan dauden zinemagile gazteei zuzendutako programa berria. SGAE Fundazioarekin batera antolatu eta garatutako ekimenak, Euskal Herriko Unibertsitatearen (EHU) laguntzarekin, 25 proiektu jaso ditu lehen deialdian, eta bere jarduerak Jaialdiaren 68. edizioan egingo dira, azaroaren 20tik 27ra bitartean.

GazteDoku ikus-entzunezko prestakuntzatik arlo profesionalerako trantsizioa errazteko sortu da, parte-hartzaileei beren ideiak garatzeko, adituekin kontrastatzeko eta zinema-industrian lehen harremanak ezartzeko tresnak eskainiz. Bere izenak euskarazko "gazte" eta "dokumentala" hitzak uztartzen ditu, ez-fikziozko zinemaren aukera narratiboak esploratzeko interesa duen sortzaile belaunaldi berri bati babesa emateko borondatea islatuz.

Deialdia ZINEBIk gonbidatutako zinema-eskolen, ikus-entzunezko fakultateen eta prestakuntza-programen bidez bideratu da. Jasotako 25 proiektuetatik, zortzi proposamen hautatu dira, horietatik lau Euskadikoak eta beste lau Estatukoak, eta haien taldeek dokumentalgintzan lehen urratsak egiteko diseinatutako jarduera-programa batean parte hartzeko aukera izango dute.

ZINEBI 68 jaialdian parte hartzen duten bitartean, hautatutako taldeek beren proiektuak aurkeztu eta lantzeko aukera izango dute, mentore eta sektoreko profesionalekin egingo diren aholkularitza-saioen bidez. Programaren helburua entzute-, truke- eta ikaskuntza-gune bat eskaintzea da, zinemagileek beren proposamenak sakondu eta dokumentalgintzaren industriaren funtzionamendua bertatik bertara ezagutu dezaten.

Laguntza-prozesu horren barruan, GazteDokuk 3.000 euroko bi garapen-laguntza emango ditu, bata Euskadiko proiektu bati eta bestea Estatuko bati. Biek, gainera, 2027ko

ZINEBI Foro Profesionalean parte hartzea bermatuta izango dute, betiere beren garapen-egoerak testuinguru horretan aurkeztea ahalbidetzen badu.
Horrela, laguntza ez da Jaialdian parte hartzera mugatzen; aitzitik, proiektuek ekoizpen-fase berrietara jauzi egin eta lankide eta kolaboratzaile posibleak aurkitzeko jarraipena bermatzen du.

GazteDoku ZINEBIren jarduera profesionalaren barruan txertatzen da, eta zinema-prestakuntzaren eta ZINEBI Networking ekimenaren arteko lotura indartzen du. Azken hori Jaialdiaren barruan ikus-entzunezko proiektu berriak sustatzera bideratutako gunea da.

Bere 68. edizioan, ZINEBIk Bilboko Dokumental Zinemaren Foro Profesionalaren XX. edizioa ere egingo du. Foro horrek zinemagileak, ekoizleak, programatzaileak, telebistak, plataformak eta sektoreko beste eragile batzuk bilduko ditu. Programaren barruan garapen-fasean edo amaierako fasean dauden dokumentalen aurkezpenak, banakako bilerak eta topaketa profesionalak egingo dira.

GazteDokuren eta Foroaren arteko harremanak laguntza-ibilbide bat ezartzea ahalbidetzen du, lehen ideia zinematografikoetatik hasi eta industriako profesionalen aurrean aurkezteraino luzatu daitekeena.

Proiektuen garapenaren aldeko apustu horrek emaitza ikusgarriak eman ditu dagoeneko ZINEBIren programazioan. Xisi Sofia Ye Chenen “La noche de la infancia”, Rafael Molés eta Pepe Andreuren “La Pietà”, eta Samuel Nacarren “Taranta” filmak, aurretik ZINEBI Networking-en parte hartu zutenak, aurten Essential Docs sailean izango dira, nazioarteko jaialdi eta topaketetan egindako ibilbidearen ondoren.

GazteDoku, horrela, Jaialdiaren beste ekimen batzuei gehitzen zaie, hala nola ZINEBI Animation Lab eta ZINEBI Express programei, zinemagile gazteentzako prestakuntza, sorkuntza eta profesionalizazio aukerak zabalduz.

GazteDoku 2026 ZINEBIk eta SGAE Fundazioak batera antolatu dute, SGAEren Euskal Autonomia Erkidegoko Lurralde Kontseiluaren laguntzarekin eta Euskal Herriko Unibertsitatearen (EHU) babesarekin.