Masterclass

Euskal animazioa une bereziki garrantzitsua bizitzen ari da. Azken urteotan, Euskadiko zinemagileek, estudioek eta ekoiztetxeek nazioarteko mapan sendo kokatzea lortu dute, bikaintasun teknikoa, identitate sortzailea eta narraziorako gaitasuna konbinatuta. Modu erregularrean egon da erreferentziazko jaialdietan, hala nola Annecy eta Donostian, edo Quirino sarietan; horrez gain, arrakasta izan du Goya sarietan eta Europako koprodukzio foroetan, Cartoon Movie-n esaterako. Horrek guztiak berretsi egiten du talentu berrientzako bidea irekitzen eta sektorearentzat irudi prestigiotsu bat sendotzen jakin izan duen belaunaldi baten sendotasuna.

Heldutasun artistiko horrez gain, hedatzen ari den prestakuntza-ekosistema dugu, izan ere, animatzaileen belaunaldi berrientzat gero eta oinarri sendoagoa eskaintzen duten unibertsitate-zentro, eskola espezializatu eta heziketa-zikloak ditugu. Horri guztiari esker, Euskadi lurralde dinamiko gisa aintzatesten dute animazioaren esparruan, eta ahots bereziak, proposamen ausartak eta nazioarteko bokazio gero eta handiagoa ditu.

Eusko Jaurlaritzako Kultura Sailak finantzatuta, ZINEBI Animation Lab animaziozko zineman espezializatutako topaketa eta prestakuntzarako gune bat da, eta sormen laborategi gisa sortu zen. Profesionalak, ikasleak eta zinemagile gazteak elkartzen ditu, animazio-proiektuen produkzio, idazketa eta garapen prozesuak ikuspegi garaikidetik eta nazioartekotik arakatzeko.

Programak egungo animazioaren munduko pertsona gailenek emandako masterclassak eskaintzen ditu, baita proiektuak aztertzeko saioak, tutoretzak eta networking jarduerak ere. Horrez gain, lehen edizio honen emaitza gisa, Jaialdirako hainbat goiburu sortzen ari dira, Digipen Institute of Technology Europe-Bilbao, UPV/EHUko Arte Ederren Fakultatea eta Gasteizko ID Arte Diseinu Publikoko Eskolarekin lankidetzan, eta ZINEBIren inaugurazio ekitaldian aurkeztuko dira.