ZINEBI – Bilboko Zinema Dokumental eta Film Laburren Nazioarteko Jaialdia FIAPFek film laburren eta dokumentalen kategorian 1974tik aintzatetsitako Estatuko jaialdi bakarra da. ZINEBIk 65 urtetik gorako ibilbidea du eta azaro bakoitzean ospatzen da Bilbon.

ZINEBI gorabidean dauden autoreak babesten dituen jaialdia da. Nazioarteko film laburren lehiaketa (dokumentala, animazioa eta fikzioa) da bere ezaugarri nagusia. Gainera, urtero urteko dokumental luzerik onenetako batzuk proiektatzen ditugu Beautiful Docs sailean.

Euskal ikus-entzunezkoen industria babesten dugu Bertoko Begiradak sailean euskal film labur eta luzeen sorta zabala erakutsiz, baina, era berean, euskal eta estatuko zinemaren industriarekin dugun konpromisoa adierazten dugu ZINEBI Networking-en bitartez, industria-jarduerak, topaketa profesionalak, hitzaldiak eta elkarrizketak barne antolaturik.

ZINEBIk Ohorezko Mikeldi sariak ematen ditu urtero, izen handiko zinemagileen karrera aitortzeko: Frederick Wiseman, Albert Serra, Agnieszka Holland, Laura Poitras, Margarethe von Trotta, Marco Bellocchio, Jean-Pierre eta Luc Dardenne, Claire Simon, Wang Bing, Apichatpong Weerasethakul, Marta Mészáros, Hirokazu Kore-eda, Liliana Cavani, Barbara Kopple, Imanol Uribe, Carlos Saura, Aki Kaurismäki beste batzuen arte.

Aurten, ZINEBIk 67. edizioa ospatuko du. Azaroaren 21etik 28ra bitartean itxarongo zaituztegu Bilbon.

Irailetik aurrera, ZINEBIren edizio berri honi buruzko informazio gehiago eta zehatzago argitaratuko dugu. Ordura arte, zuen filmekin parte har dezakezue. Ekainaren 20ra arte zabalik dago film laburrak helarazteko deialdia (gehieneko iraupena: 30 minutu). Bidali zuen azken lanak esteka honetan.