ZINEBI – Bilboko Dokumentalen eta Film Laburren Nazioarteko Jaialdiak, Bilboko Udalak antolatuta, bihar emango dio amaiera 64. edizioari, 19:30ean, Arriaga Antzokian. Ekitaldian zehar, epaimahaiek film labur eta luze sarituei emandako sariak banatuko dira. Gainera, Albert Serra kataluniar zinemagileak Ohorezko Mikeldi saria jasoko du, Mendebaldeko artean ibili den eta igarotzen den bide ezberdinetan inspiratutako irudi ahaztezinen sorta luze batean egindako ibilbidearen omenaldi gisa.

Modu honetan, jaialdiak ikusmin handiko eta mugimenduan dauden irudien edertasunari buruzko bere ikusmolde erradikalean erosezina den zinemagile baten obra osoa aintzatesten du. Nahikoa da aipatzea Serra Estatuan ekoitzitako zinemaren ordezkari bakarra izan zela munduko zinemaldirik garrantzitsuenaren Sail Ofizialean,Cannesen, hain zuzen ere. Han aurkeztu zuen “Pacifiction” (2022), bere azken fikziozko lana.

Bere  lana munduko zinema-panoramika hautatuenean egotea, zalantzarik gabe, Serra zinema garaikidean egilearen ideia hobekien gorpuzten duen egungo zinemagileetako bat izatearen ondorioa da. Aurretik, Epaimahaiaren Sari Berezia lortu zuen Un certain regard sailean (hau ere Cannesen), “Liberté” (2019) filmarekin; Marseillako Zinemaldiko Film Onenaren Saria, ”Roi Soleil” (2018) filmarekin; eta, besteak beste, Locarnoko Jaialdian Film Onenaren Urrezko Lehoinabarra, “Història de la meva mort” (2013) filmarekin.

Gaur arratsaldean, 19:00etatik aurrera, Serra eta Harvard Unibertsitateko Film Study Centerreko aholkulari eta Mar del Platako (Argentina) Nazioarteko Zinema Jaialdiko zuzendari artistiko ohi Cecilia Barrionuevo  publikoaren aurrean elkarrizketan arituko dira Bilboko Guggenheim Museoko Auditorioan.

 

“PELOTA” DOKUMENTALAREN ZUZENDARIA BILBORA ITZULI DA

Albert Serrarena ez da ZINEBIren 2022ko edizioak jasotzen duen azken bisita izango; izan ere, 85 urte dituela, Jørgen Leth daniar poeta eta zinemagileak ere ez du Bilbora itzultzeko aukera galdu nahi izan bere azken lana aurkezteko. “Music for Black Pigeons” (Andreas Koefoedekin batera zuzendua, 2022) Veneziako Biennaleko Sail Ofizialean estreinatu berri da, eta ZINEBIn aste honetan egon da ikusgai.

Jørgen Leth, “Pelota” (Ole John zuzendarikidea, 1983) eta “Pelota II” (Olatz Gonzalez Abrisketa zuzendarikidea, 2015) film gogoratuen zuzendaria, zinema dokumental esperimentalaren erreferente handienetako bat da,“The Perfect Human” (1968) edo “Cinco condiciones” (“De fem benspænd”, Lars von Trier zuzendarikidea, 2003) bezalako lanei esker. Oraingo honetan, Bill Frisell, Joe Lovano edo Lee Konitz saxofoi jotzaile zendu berria bezalako izen handiko jazz musikari garaikideen sormen prozesua du ardatz.

Jaialdiaren prentsa materiala esteka honetan kontsulta daiteke.