Kanonetik kanpo
Gonzalo Olabarria.Kultura eta Gobernantza zinegotzia
Ez genuen zalantza handirik, bagenekien zinemarenak egin duela ziotenak oker zebiltzala. Denok dakigu zazpigarren arteak etengabe berrasmatzen duela bere burua, ez duela amore ematen eskaintza heterodoxo batekin ikusle berriak erakartzeko ahaleginean. Hala ere, aurten zinema-aretoetara joan diren ikusleen kopuruak aintzat hartuz gero, lau haizeetara aldarrika dezakegu zinemak gure bizitzetan jarraitu beharko lukeela beste zenbait belaunaldiz, haren erakargarritasuna suspertu egin baita.
Printzipio horren defentsan dihardute —azkenaldian aretoetan arrakasta handiena izan duten filmak ematen ez badituzte ere, ez baita hori dagokien lekua— zinema jaialdiak. Inor ez dago ZINEBI noiz iritsiko zain Barbie, Oppenheimer edo Campeonex arrakastatsuak ikusteko. Izan ere, dirudienez, ikusleak saio horietara erakartzeko nahikoa da publizitate kanpaina distiratsuak egitearekin.
Dena den, Bilboko Dokumentalen eta Film Laburren Nazioarteko Jaialdiak, bere ibilbidea eta prestigioa ikusita, haize berri horiek aprobetxatu behar ditu: aldeko haizeak eraman dezan utzi behar du eta eskaintza zabaldu, aisialdirako eta kulturarako berriro ere zinema-aretoak aukeratu ohi dituzten ikusleentzat. Gainera, munduko zinema jaialdi handi guztiek bezala, ZINEBIk bilbotarrek aurretik ikusi ezin izan dituzten filmak ekarri nahi ditu gure aretoetara: kanonetik kanpo egoteko (edo ez) baimena duen zinema, Estatuko hirugarren zinemaldi zaharrenaren ezaugarri izan den zinema, bizkarrezur gisa mundu osotik iritsitako animazio-, fikzio- eta dokumental-film labur berritzaileen aukeraketa bat duena; opera prima film luzeak, lehenengo filmagatik dena eman duten ahots berrien zinemako debutak, apika XXI. mendeko zinemaren maisuen izenak izango direnak; gure garaiari, zinemari eta gure historiari buruzko dokumentalak; eta Euskadin ahalegin handiz egindako film sorta handia, zeinak hurbilen dituzten ikusleekin topo egin nahi baitute.
Gizarte kultu, jakin-mindun eta kritiko bat eraikitzeko, oinarrizkoa da gizarteak ezaguna duen horretatik harago doazen zinema, musika, literatura, antzerkia eta, oro har, artea ezagutzeko duen gaitasuna. Erabat sinetsita hartzen dugu gure gain, erakunde publiko gisa, gure herritarrei aukera hori eskaintzeko betebeharra, bilbotarrek mila bider agertu duten jakin-minari erantzutekoa. Eta zinemaren kasuan, ZINEBIk aukera eman diezaien etxetik ateratzeko eta aretoetara joateko, kultura- eta arte-eskaintza pluralagoa, aberatsagoa, iradokitzaileagoa eta probokatzaileagoa aurkitzeko.
